सरकार परिवर्तन बारे के भन्छन् माधव नेपाल

जनकपुर । नेपाल कम्युनिस्ट पार्टी (एकीकृत समाजवादी) का अध्यक्ष माधवकुमार नेपालले अहिलेको सरकार तत्काल परिवर्तन नहुने बताउनुभएको छ । बिहीबार जनकपुरमा उहाँले सञ्चारकर्मीसँगको भेटमा सो कुरा बताउनुभयो ।

सरकार परिवर्तन हुँदैन, उहाँले भन्नुभयो, “सामान्य फेरबदल हुनसक्छ । मन्त्रीमा सामान्य फेरबदल भने हुन सक्छ ।” स्थानीय तहको चुनावमा

एमालेसँग गठबन्धनको सम्भावना नरहेको उहाँले प्रष्ट पार्नुभयो । एमालेको छुद्र बोली अभिव्यक्ति व्यवहारका कारण चुनावमा गठबन्धनको कल्पनासम्म नगरेको उहाँको भनाइ छ ।

पार्टीको मधेस प्रदेशस्तरीय बिस्तारित बैठकमा सहभागी हुन यहाँ आउनुभएका अध्यक्ष नेपालले अहिलेको गठबन्धन सरकार विभिन्न तहमा क्रियाशील रहेको र क्रियाशील रहिरहने बताउनुभयो ।

अहिलेकै सरकारले निर्वाचन गराउँछ उहाँले भन्नुभयो, “चुनावी सिटमा कसरी तालमेल गर्ने सम्बन्धमा पनि छलफल चलिरहेको छ । विचारमा विविधता छ तर नेतृत्वमा एउटा सामन्जस्य छ ।”

हाम्रो पार्टी गठबन्धनमा के हुन्छ भनेर चिन्ता गरेर चल्ने पार्टी होइन उहाँले भन्नुभयो, “प्रत्येक पार्टी आफनो शक्ति र सामथ्र्यको आधारमा आवश्यकता महशुस गर्छ भने वीन–वीनको आधारमा

सबैको उचित मर्यादा, उचित स्थान, सम्मान दिएर मिलेर जान सकिन्छ ।” अरुको सम्मान गर्ने र आफनो पनि सम्मान खोज्ने हिसाबले अघि बढ्ने उहाँले प्रष्ट पार्नुभयो ।

त्रिविमा देखिएका समस्या तत्काल समाधान हुनुपर्छ : मन्त्री भुसाल

ऊर्जा, जलस्रोत तथा सिँचाइमन्त्री पम्फा भुसालले ऐतिहासिक विरासत बोकेको त्रिभुवन विश्वविद्यालयमा चुनौती चुलिँदै गएको बताउनुभएको छ ।

नेपाल राष्ट्रिय कर्मचारी सङ्गठन, त्रिभुवन विश्वविद्यालय केन्द्रीय समितिको चौथो राष्ट्रिय अधिवेशन उद्घाटन गर्दै उहाँले विश्वविद्यालयसम्बद्ध पक्षले गहन समीक्षा गरेर उत्पन्न चुनौतीलाई व्यवस्थापन गर्नेतर्फ लाग्न आग्रह गर्नुभयो ।

व्यक्तिले खोलेका शिक्षण संस्थाले नाफा कमाउने र त्यहाँ विद्यार्थीको भीड हुने तर त्रिभुवन विश्वविद्यालयका कुनै संकायमा विद्यार्थीभन्दा शिक्षक बढी हुने अवस्था कसरी आयो भन्दै मन्त्री भुसालले व्यवस्थापन,

प्रशासन र प्राध्यापन तीनै क्षेत्रले जवाफ दिने अवस्था आएकोे बताउनुभयो । उहाँले भन्नुभयो, “एकले अर्कोलाई देखाउनेभन्दा पनि समस्या समाधान कसरी गर्ने भन्ने विषयमा विशेष ध्यान जानुपर्छ ।”

जनताको कर र जनताका छोराछोरीले तिरेको ‘शुल्क’बाट चल्ने संस्थाले आफ्नो जिम्मेवारी भुल्न नहुने उल्लेख गर्दै मन्त्री भुसालले साधन र स्रोतलाई सही तवरले

सञ्चालन तथा व्यवस्थापन गरेर फाइदा लिनुपर्ने बताउनुभयो । उहाँले भन्नुभयो, “भिसी र रेक्टरकोमा ताला लागेको ६८ दिन भयो रे, एक दिन पनि विलम्ब नगरी समस्याको समाधान खोज्नुहोस् ।”

मन्त्री भुसालले भन्नुभयो, “अधिकांश सार्वजनिक क्षेत्रका जनशक्ति त्रिविकै छन् । देशको विकासका निम्ति आवश्यक पर्ने जनशक्ति उत्पादनमा त्रिभुवन विश्वविद्यालयको महत्वपूर्ण योगदान छ ।”

त्रिभुवन विश्वविद्यालयका शिक्षाध्यक्ष शिव भुसालले समग्र शैक्षिक सुधारका लागि पनि यस विश्वविद्यालयमा सुधार हुनुपर्नेमा जोड दिनुभयो ।

उहाँले भुन्नुभयो, “त्रिविले शैक्षिक गुणस्तरको नेतृत्व गर्नुपर्छ, त्यसका लागि निरन्तर काम गर्नुपर्छ ।” कार्यक्रममा शैक्षिक क्षेत्रमा योगदान गर्ने विभिन्न व्यक्तिलाई सम्मान गरिएको थियो ।

Leave a Reply

Your email address will not be published.