गुल्मीका दुबै नगरपालिकामा एमालेले टुंग्यो लगायाे मेयर उम्मेदवार

तमघास । गुल्मीका दुई नगरपालिकामध्ये एमालेले दुई वटामै मेयर पदको उम्मेदवार टुङ्गिएको छ । एमालेले मुसिकोट नगरपालिकामा यसअघि नै जीवन खरेललाई मेयरको उम्मेदवारमा सर्वसम्मत सिफारिस गरेको थियो ।

यस्तै रेसुङ्गा नगरपालिकामा मंगलबार मेयरको उम्मेदवारमा राजेन्द्र पाण्डेलाई सर्वसम्मत सिफारिस गरेको छ । एमालेले दुई वटै नगरपालिकामा उम्मेदवार टुंगो लगाउँदा नेपाली काँग्रेसले भने एक नगरपालिकामा मात्रै उम्मेदवार टुंगो लगाएको छ ।

काँग्रेसले मुसिकोट नगरपालिकामा हरिनारायण सापकोटालाई मेयरको उम्मेदवार बनाउने निर्णय गरेको छ भने रेसुङ्गा नगरपालिकाको उम्मेदवार टुङ्गो लगाउन सकेको छैन ।

याे पनि पढ्नुस् : तिलोत्तमा नगरपालिकाको मेयरमा एमालेले गर्‍यो ४ जनाको नाम सिफारिस

नेकपा एमालेले रूपन्देहीको तिलोत्तमा नगरपालिका प्रमुखको उम्मेदवारका लागि चार जनाको नाम सिफारिस गरेको छ ।

एमाले तिलोत्तमा नगर कमिटीको बैठकले बहालवाला मेयर वासुदेव घिमिरे, नेताहरू मोहन चापागाईं, यज्ञ गैरे र दिनेश फुल्लेलको नाम सिफारिस गरेको नगर कमिटी अध्यक्ष तामनाथ पाण्डेले जानकारी दिए ।

बैठकले तिलोत्तमाको उपप्रमुख (उपमेयर) पदका लागि पाँच जनाको नाम सिफारिस गरेको छ । बहालवाला उपमेयर जागेश्वरदेवी चौधरी, नेतृहरू देवी वाग्ले, रेनुका खरेल, जमुना लम्साल र संगीता गुरुङको नाम उपमेयरका लागि सिफारिस गरेको हो ।

गृहमन्त्री खाँणको गृहनगर भएकाले तिलोत्तमालाई चासोका साथ हेरिएको छ ।

भरतपुरमा कांग्रेसका २५ वडा सभापतिको निर्णय- मेयर नपाए सबै वडामा स्वतन्त्र उम्मेदवार

चितवनको भरतपुर महानगरपालिकामा रहेका कांग्रेसका सबै वडा सभापतिहरूले आगामी चुनावमा मेयरको टिकट कांग्रेसले पाउनु पर्ने निर्णय गरेका छन्।

मंगलबार जिल्ला पार्टी कार्यालयमा भरतपुरका २९ मध्ये २५ वडाका कांग्रेस सभापतिको बैठक बसेको थियो। उक्त बैठकले वैशाख ३० मा हुने स्थानीय चुनावमा भरतपुरको मेयर कांग्रेसले पाउनु पर्ने र नपाए विद्रोह गर्ने निर्णय गरेको हो।

बैठकमा सहभागी वडा नम्बर १४ का सभापति राजेन्द्र शाँखीले भरतपुरको मेयरको टिकट अरू दललाई दिने निर्णय केन्द्रले गरेर पठाए आफूहरूले नमान्ने बताए।

‘कांग्रेसको चितवन जिल्ला कार्यसमितिले पनि भरतपुरको मेयर कांग्रेसले लिएर सत्तारूढ गठबन्धनका दलसँग तालमेल गर्ने निर्णय गरेको छ। केन्द्रले जबरजस्ती अरू दलकालाई मेयरको टिकट दिने निर्णय गरे हामी मान्दैनौं,’

शाँखीले भने,‘त्यसको विरोधमा हरेक वडामा अध्यक्षका लागि स्वतन्त्र उम्मेदवारी दिन्छौं।’

वडा सभापतिहरूले गरेको निर्णय जिल्ला सभापति राजेश्वर खनाललाई बुझाइसकेको उनले जानकारी दिए। चार वडाका सभापति प्राविधिक कारणले बैठकमा नआए पनि निर्णयमा उनीहरूको समर्थन रहेको शाँखीले बताए।

२०७४ को चुनावमा भरतपुरमा कांग्रेसले माओवादीसँग तालमेल गरेर मेयरमा उम्मेदवारी दिएको थिएन।

माओवादी केन्द्रका अध्यक्ष पुष्पकमल दाहाल ‘प्रचण्ड’ को निर्वाचन क्षेत्र पनि पर्ने भरतपुरको मेयरमा उनकी छोरी रेनु दाहाल निर्वाचित भएकी थिइन्।

माओवादीले अहिले पनि भरतपुरको मेयर आफैंले राख्न चाहेको छ। चितवन कांग्रेसका नेताहरूले भने भरतपुरको मेयर आफूले पाउनु पर्ने भन्दै लबिङ गरिरहेका छन्।

Leave a Reply

Your email address will not be published.