पत्रकारिताका सिद्धान्त स्मरण गराउँदै उपमेयर डङ्गोलले भनिन्– म महानगरको अभियानमै छु

काठमाडौं। काठमाडौं महानगरपालिकाकी उपमेयर सुनिता डङ्गोलले कानुन् कार्यान्वयनका सन्दर्भमा महानगरले अगाडि बढाएको अभियानमा आफू सँगसँगै रहेको प्रष्टीकरण दिएकी छिन् ।

महानगरले अगाडि बढाएको अभियानमा उपमेयरको उपस्थिति नदेखिएको विषयलाई लिएर केही दिनयता विभिन्न सञ्चारमाध्यमहरूले सम्प्रेशण गरेको समाचारहरूमा आफ्नो गम्भीर ध्यानाकर्षण भएको जनाउँदै उनले आफू महानगरले अगाडि बढाएको सबै अभियानमा सँगै रहेको प्रष्टीकरण दिँदै सो कुरा बताएकी हुन् ।

‘सार्वजनिक वा सरकारी जग्गा अतिक्रमण गरी निर्माण गरेका अनधिकृत संरचना (निर्माण कार्य तथा नक्सा स्वीकृती गर्दा भुँइतला वा बेसमेन्टलाई पार्किङको प्रयोजन देखाई पछि अन्य व्यापारिक प्रयोजनमा लगाएका संरचना) हटाउने कार्यलाई केही दिनदेखि काठमाडौँ महानगरपालिकाले निरन्तरता दिदैँ आएको विदितै छ ।

त्यस्ता अनधिकृत संरचना हटाउने अभियान काठमाडौँ महानगरपालिकाको हो,’ डङ्गोलले अपिल जारी गर्दै भनेकी छिन्, ‘म काठमाडौँ महानगरपालिकाको उपमेयरको हैसियतमा छु । त्यसैले कानुन कार्यान्वयन गर्ने सबै कार्यमा मेरो साथ, सहयोग र समर्थन रहेको स्मरण गराउन चाहन्छु ।’

काठमाडौं महानगरलाई साँच्चिकै स्वच्छ, सुन्दर, जीवन्त र व्यवस्थित सांस्कृतिक नगरका रूपमा थप विकास गर्ने आफ्नो एजेण्डाप्रति आफू सजग र सचेत रहेको स्मरण गराउँदै उनले केही दिनदेखि मुख्य गरेर केही अनलाइन मिडियाहरुमा महानगरपालिकाको पछिल्लो अभियानसँग आफूलाई जोडी आम महानगरवासीमा समेत भ्रम सिर्जना गर्ने गरी गरेका समाचार सम्प्रेषणप्रति आफ्नो गम्भीर ध्यानाकर्षण भएको जनाएकी छिन् ।

‘पत्रकारिता क्षेत्रलाई राष्ट्रको चौथो अंगका रुपमा लिइने गरिएको छ । पत्रकारिता क्षेत्रमै निरन्तर लागिरहनु भएका पत्रकार मित्रहरुलाई पत्रकारिताका तीन सिद्धान्त सत्यता, सन्तुलन र विश्वसनीयताका बारेमा मैले यहाँ व्याख्या गरिरहनु पर्ने आवश्यकता ठानेको छैन ।

यद्यपि, पत्रकारिताको धर्म र मर्मलाई समेत सामान्य हेक्का नराखी वा मसँग जोडिएका समाचारमा मेरो कुनै प्रतिक्रिया नै समावेश नगरी एकपक्षीय र अनुमानका भरमा समाचार सम्प्रेषण गरी भ्रम सिर्जना गर्ने कार्यले पत्रकारिताप्रतिको विश्वसनीयता नै कमजोर हुनेप्रति ख्याल राखिदिनुहुन अनुरोध गर्दछु ।’

 

Leave a Reply

Your email address will not be published.