अब भिनाजुले बिदेशबाट सालीलाई पठाइदिएकाे गिफ्ट आइफाेन नचल्न सक्छ ! आजदेखि नयाँ नियम लागू

काठमाडाैं । नेपाल दूरसञ्चार प्राधिकरणले मोबाइल डिभाइस म्यानेजमेन्ट सिस्टम (एमडीएमएस) लागू गरेको छ। आजदेखि यो प्रणाली लागू गरिएसँगै अब दर्ता नभएका मोबाइल फोन नेपालमा सञ्चालन हुन पाउने छैनन्।

मोबाइल सेटको गैरकानूनी आयात, बिक्री वितरण तथा प्रयोगलाई निरूत्साहित गर्न यो प्रणाली लागू गरिएको प्राधिकरणले जनाएको छ। यो प्रणाली लागू भएसँगै चोरी भएका तथा हराएका मोबाइल सेटको ट्रयाकिङ र ब्लकिङ गरी नेपालभित्र त्यस्ता मोबाइल नचल्ने बनाइनेछ।

यो प्रणाली कार्यान्वयनमा गएसँगै अब नेपाल भित्रिने सबै मोबाइल फोनहरू दर्ता गर्नु पर्नेछ। दर्ता नभएका मोबाइल फोनमा सिमकार्डले काम गर्ने छैनन्। यद्यपि, आजसम्म सञ्चालनमा आएका मोबाइल फोन भने दर्ता गर्नु नपर्ने प्राधिकरणले जनाएको छ।

प्राधिकरणका अनुसार‚ भदौ ३० पछि भित्रिने सबै मोबाइल अनिवार्य दर्ता गर्नुपर्ने छ। विदेशबाट आफन्तले पठाइदिएको मोबाइल फोन पनि प्राधिकरणको प्रणालीमा गएर आईएमईआई नम्बर दर्ता गरेपछि मात्रै सञ्चालन हुने प्राधिकरणका सूचना अधिकारी सूर्यप्रसाद लामिछानेले बताए।

प्राधिकरणले मोबाइल खरीद गर्दा यो प्रणालीमा दर्ता भए नभएको यकिन गरेर मात्रै खरीद गर्न सूचना जारी गरेको छ। मोबाइल आयताकर्ता र बिक्रेतालाई पनि प्राधिकरणले स्वीकृत लिई प्रणालीमा दर्ता भएका मोबाइल मात्रै बिक्री गर्न निर्देशन दिएको छ।

नेपालमा मोबाइल बिक्रेताहरूले लामो समयदेखि यो प्रणाली सञ्चालनमा ल्याउन माग गर्दै आएका थिए। भन्सार नतिरी भित्रिएका मोबाइल फोनका कारण आफूहरूको बजार खोसिएको उनीहरूले दाबी गर्दै आएका थिए।

साथीभाइ र आफन्तले ल्याएका फोन पनि घानमा?

हुन त विदेशबाट आउँदा एउटा मोबाइल फोन ल्याउन खासै रोकटोक छैन। बाहिर साथीभाइ र आफन्त हुनेले मगाउने चिजबिजमा मोबाइल पहिलो रोजाइ बन्दै गएको छ।

के अब नयाँ नियम लागु भयो भने त्यसो गर्न नपाइएला?

प्राधिकरणका सहायक प्रवक्ता मिश्र भन्छन्, “सम्पर्कविहीन पार्न खोजेको होइन। तर ल्याउँदा उचित तरिकाले दर्ता गराउनुपर्‍यो।” व्यवसायीहरूले पनि आफन्तले ल्याउने फोन टाउको दुखाइ नभएको बताउँछन्।

“कसैले साथीभाइ वा आफन्तका लागि ल्याइदिने एउटा फोन हाम्रो टाउको दुखाइ नै होइन। तर यहाँ त कतिपयले बाहिरको विमानस्थलमा फोन भिडाएर यहाँ लिने गरेको पाइएको छ। त्यसैले एमडीएमएस आवश्यक परेको हो,” मल्होत्राले भने।

पर्यटकहरूको हकमा उनीहरूले बोक्ने मोबाइल फोन यहाँ आएको एक महिना जति चल्न दिने र त्यसपछि मात्र दर्ताको निम्ति आग्रह गर्ने प्रणाली बनाउन सकिने उनले बताए।

सर्वसाधारणमा अझै पनि रहेका केही संशय अनि अन्य प्राविधिक तथा व्यवस्थापकीय जटिलता समाधान गर्न सके मात्र प्राधिकरणले सहज रूपमा एमडीएमएस लागु गर्न सक्ने जानकारहरू बताउँछन्।

Leave a Reply

Your email address will not be published.