अहिलेसम्म कुन कुन पार्टीले कहाँ कहाँ जिते ?

काठमाडाैं । आइतबार सम्पन्न प्रतिनिधि सभा निर्वाचनको मतगणना जारी छ। केही स्थानको अन्तिम परिणाम आउने क्रम सुरू भइसकेको छ। अहिलेसम्म २० स्थानको मतपरिणाम आइसकेको छ।

यी क्षेत्रमध्ये नेपाली कांग्रेसले ११, नेकपा एमालेले ३, राष्ट्रिय स्वतन्त्र पार्टीले ३, राप्रपाले १, नेकपा एकीकृत समाजवादीले १ र नागरिक उन्मुक्ति पार्टीले १ ठाउँमा जितेका छन्।

नेपाली कांग्रेसः काठमाडौं- १, प्रकाशमान सिंह। डडेल्धुरा, शेरबहादुर देउवा। काठमाडौं- ४ मा, गगन कुमार थापा। मनाङ, टेकबहादुर गुरुङ। मुस्ताङ- १, योगेश गौचन थकाली। रसुवा, मोहन आचार्य।

ललितपुर- १, उदयशमशेर राणा । काठमाडौं- ५, प्रदीप पौडेल। काठमाडौं- ३, सन्तोष चालिसे। सुर्खेत-२, हृदयराम थानी। तनहुँ-२, शंकर भण्डारी।

राष्ट्रिय स्वतन्त्र पार्टीः काठमाडौं-७, गणेश पराजुली। काठमाडौं-२, सोविता गौतम। काठमाडौं-२, विराजभक्त श्रेष्ठ।

नेकपा एमालेः ललितपुर-२, प्रेमलाल महर्जन। काठमाडौं-९, कृष्ण गोपाल श्रेष्ठ। उदयपुर-२,अम्मरबहादुर रायमाझी।

नेकपा एकीकृत समाजवादीः अछाम- १, शेरबहादुर कुँवर। नागरिकता उन्मुक्ति पार्टीः

कैलाली- ३, गंगाराम चौधरी।
राप्रपाः बाँके-२, धवलशमशेर राणा।

नेपाली कांग्रेसका सभापति तथा प्रधानमन्त्री शेरबहादुर देउवा डडेल्धुराबाट निर्वाचित भएका छन्।

देउवा २५ हजार ५३४ मत ल्याउँदै डडेल्धुराबाट सातौं पटक निर्वाचन भएका हुन्। उनका निकटतम प्रतिद्वन्द्वी स्वतन्त्र उम्मेदवार सागर ढकालले १३ हजार ४१ मत प्राप्त गरेका छन्। यस्तै‚ नेपाली कांग्रेस (बीपी)का कर्ण मल्लले सात हजार ५३५ मत ल्याएका छन्।

देउवाले यस क्षेत्रबाट २०४८ सालदेखि लगातार निर्वाचित हुँदै आएका छन्। उनी २०४८, २०५१, २०५६, २०६४, २०७०, २०७४ र २०७९ मा निर्वाचित भएका हुन्।

पूर्वसभामुख ओनसरी घर्ती काठमाडौं-२ बाट पराजित

पूर्वसभामुख ओनसरी घर्ती काठमाडौं क्षेत्र नम्बर २ बाट पराजित भएकी छन्।

संविधान जारी भएपछि २०७२ देखि २०७४ सालसम्म रूपान्तरित संसदको सभामुख भएकी घर्ती काठमाडौं-२ को चुनावी प्रतिस्पर्धामा चौथो स्थानमा रहँदै पराजित भएकी हुन्।

नेपालको पहिलो महिला सभामुख घर्तीलाई राष्ट्रिय स्वतन्त्र पार्टीकी सोविता गौतमले हराएकी हुन्।

२०६४ सालमा समानुपातिकबाट संविधानसभा सदस्य भएकी घर्ती दोस्रो संविधानसभामा रोल्पा-२ बाट प्रत्यक्ष निर्वाचित भएकी थिइन्। उनी २०७० सालमा संविधानसभाको उपाध्यक्ष भएकी थिइन्।

संविधान जारी भएपछि रोल्पाका दुईवटा निर्वाचन क्षेत्र गाभिएर एउटै भएको थियो। त्यसपछि उक्त क्षेत्रमा उनका श्रीमानसमेत रहेका वर्षमान पुन उम्मेदवार बन्दै आएका छन्। उनी २०७४ मा समानुपातिकबाट निर्वाचित भएकी थिइन्।

माओवादी केन्द्रले समानुपातिकतर्फका उम्मेदवार नदोहोर्‍याउने निर्णय गरेपछि घर्ती प्रत्यक्ष निर्वाचन लड्न तम्सिएकी थिइन्। सुरूआतमा उनले रूपन्देही-१ बाट निर्वाचन लड्ने तयारी गरेकी थिइन्।

तर माओवादी केन्द्रले उक्त क्षेत्रमा एमाले छाडेका घनश्याम भुसाललाई समर्थन गरेको थियो। भुसालका लागि रूपन्देही-१ छाडेकी घर्ती काठमाडौं-२ बाट उम्मेदवार बने पनि पराजित हुन पुगेकी हुन्।

सत्ता गठबन्धनबाट उम्मेदवार बनेकी घर्ती नेपाली कांग्रेसको मत ट्रान्सफर नहुँदा पराजित भएको देखिन्छ।

स्थानीय तहको निर्वाचनको मतपरिणामलाई आधार मान्दा उक्त क्षेत्रमा गठबन्धनका वडाध्यक्षहरूको मत २५ हजारभन्दा धेरै थियो। उक्त क्षेत्रमा स्थानीय निर्वाचनमा कांग्रेसले १४ हजार १ सय २८,

एकीकृत समाजवादीले ८ हजार ७४, राप्रपाले ७ हजार २ सय र माओवादी केन्द्रले ३ हजार १ सय ३१ मत पाएको थियो। त्यस्तै एमालेका वडाध्यक्षहरूले १७ हजार ३ सय २५ मत प्राप्त गरेका थिए।

काठमाडौं-२ मा स्थानीय तहको मत परिणामअनुसार एमाले सबभन्दा ठूलो दल थियो। तर सत्ता गठबन्धनको मत एमालेभन्दा धेरै थियो। काठमाडौं-२ मा एमालेका मणिराम फुयाँल दोस्रो र राप्रपाकी कुन्तीदेवी पोखरेल उपाध्याय तेश्रो भएका छन्। ओनसरी घर्ती चौथो स्थानमा रहँदै पराजित भएकी हुन्।

घर्तीलाई पराजित गर्ने सोविता गौतमले त्रिभुवन विश्वविद्यालयको नेसनल ल कलेजबाट कानुन विषयमा स्नातक गरेकी छन्। उनले अधिवक्ताका रूपमा र पत्रकारिता क्षेत्रमा समेत काम गरेकी छन्। उनी २०५२ सालमा दोलखाको तामाकोशी गाउँपालिका जामुनेमा जन्मिएकी हुन्।

Leave a Reply

Your email address will not be published. Required fields are marked *