निम्न माध्यमिक तहको नतिजा प्रकाशित हुँदै

काठमाडाैं । शिक्षक सेवा आयोगले निम्न माध्यमिक तहको विषयगत परीक्षाको नतिजा प्रकाशनको अन्तिम तयारीमा रहेको जनाएको छ । आयोगले प्राविधिक कठिनाइ नआए यही हप्ताबाट नतिजा प्रकाशन गर्ने तयारी गरेको जनाएको हो ।

आयोगका सूचना अधिकारी सुदर्शन मरहठ्ठाले कुनै प्राविधिक कठिनाइ नआए यही हप्ताबाट नतिजा प्रकाशन गर्ने तयारी गरेको जानकारी दिए ।

उनले भने “कुनै प्राविधिक कठिनाइ नआए आयोगले याही हप्ताबाट निम्न माध्यमिक तहको विषयगत परीक्षाको नतिजा प्रकाशन गर्ने तयारी थालेको छ । यदी कुनै कठिनाइका कारण यो हप्ता नतिजा नआए अर्को हप्ताबाट नतिजा प्रकाशन हुन्छ ।”

आयोगले २०७८ पुसमा विज्ञापन गरेको थियो भने करीब २१ हजार उम्मेदवार परीक्षामा सहभागी भएका थिए । त्यसैगरी निम्न माध्यमिक तहको नतिजा प्रकाशन पश्चात मात्र प्राविको नतिजा प्रकाशनको तयारी थाल्ने जनाएको छ ।

यही व्यवस्थाभित्र रहेर अवस्था परिवर्तन गर्ने सङ्कल्प छ : अध्यक्ष लामिछाने

राष्ट्रिय स्वतन्त्र पार्टीका अध्यक्ष रवि लामिछानेले यही व्यवस्थाभित्रै रहेर अवस्था परिवर्तन गर्ने आफ्नो सङ्कल्प रहेको बताएका छन् ।

चितवन क्षेत्र नं २ बाट प्रतिनिधिसभा सदस्यमा विजयी भएपछि उनले अहिलेको संविधान र व्यवस्थाभित्र रही जनताको अवस्था बदल्ने गरी काम गर्ने बताए ।

“हाम्रो विजय देशमा परिवर्तन चाहने आम दाजुभाई तथा दिदीबहिनीको हो”, उनले भने । संसद्मा राष्ट्रिय स्वतन्त्र पार्टीलाई जिम्मेवार दलका रुपमा अगाडि बढाउने उनको भनाइ छ ।

“मुलुक र नागरिकको हित के गर्दा हुन्छ भन्ने विषयमा जिम्मेवार भएर प्रस्तुत हुन्छौँ”, उनले भने, “अघिल्लो पुस्तासँग भएको निराशा र हामीसँग भएको आशा एवं अपेक्षामा खरो उत्रनेछौँ ।”

उनले अहिलेनै सरकारमा जाने वा नजाने भन्ने विषयमा टुङ्गो नलागेको बताए । “पार्टीको बैठकबाट यसबारे निर्णय गर्छौ”, उनले भने, “एक सय दिनमा एक सय युवा स्वदेश फर्काउने चुनावी ऐजेण्डा कार्यान्वयनमा ल्याउने छौँ ।”

उनले जुन कुरा आम नागरिकको हितमा हुन्छ आफू त्यसको पक्षमा हुने बताए । “मैले कहिँकतै बाटो बिराए भने खबरदारी गर्नुहोला, मलाई मतदान गरी विजयी गराउने सबैमा आभार व्यक्त गर्दछु”, उनले भने । (रासस)

Leave a Reply

Your email address will not be published. Required fields are marked *