माओवादी केन्द्रका ४९ जना सांसदलाई नै मन्त्री चाहिएपछि ….

काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले आफ्ना पार्टीका ४९ जनाले नै मन्त्री बन्न खोजेपछि आफू तनावमा परेको बताएका छन्।

शनिबार विहान नेपाल कम्युनिस्ट पार्टीका संस्थापक नरबहादुर कर्मचार्यको ८ औं स्मृति दिवसको अवसरमा पार्टी कार्यालय पेरिसडाँडामा आयोजित कार्यक्रममा प्रचण्डले आफ्नो पार्टी नेकपा माओवादीका सबै सांसदले मन्त्री चाहेको बताए।

‘मन्त्री बन्न दबाब दिने मान्छेहरुको हुलबाट आएको छु म’ अध्यक्ष प्रचण्डले भने, ‘ ४९ जना सबैलाई मन्त्री चाँहिएको छ। तर पाउने त थोरै छ।’

पछिल्लोसमय पद र अवसर नपाए नेतृत्वलाई गाली गर्ने प्रवृत्ति बढेको उनले जनाए।

‘मन्त्री नभए नेतृत्वलाई सरापेर हिँड्ने अवस्था बनेको छ,’ उनले भने, ‘नियुक्ति पायो भने ठिक छ नभए नेतृत्व बदमाश भनेर गाली गर्ने प्रवृतिको विकास भएको छ।’ मन्त्री छान्ने विषयले आफू केही दिन यता मानसिक रुपमा तनावमा परेको उनले बताए।

‘४/५ दिनदेखि मानसिक तनावमा छु म, सबै ४९ जनालाई नै मन्त्री बनाउन मिले त बनाइदिनु हुन्थ्यो’ उनले भने, ‘कुरा आदर्शको गर्ने तर चित्त चाँहि मन्त्री पाइन्छ कि पाइदैन भन्ने छ।’ प्रचण्डले नरबहादुर कर्मचार्यको आदर्शबाट पार्टी नेता कार्यकर्ताले सिक्नुपर्ने बताए।

शेरबहादुर देउवा नेतृत्वको सरकारमा माओवादीबाट अहिले २ सांसद मन्त्री रहेका छन्। अब माओवादीका भागमा पर्ने ६/७ जना मन्त्री बन्न पाउने अवस्था भएपनि सबैले मन्त्री चाहेको भन्दै प्रचण्डले असन्तुष्टि व्यक्त गरेका हुन्।

याे पनि समाचार 

प्रचण्डले भेटे माधव नेपाललाई, गठबन्धन भत्काउन नदिने प्रण

नेकपा (माओवादी केन्द्र) का अध्यक्ष पुष्पकमल दाहाल ‘प्रचण्डले’ नेकपा (एमाले) का वरिष्ठ नेता माधव कुमार नेपालसँग भेटवार्ता गरेका छन् । नेता नेपाललाई भेट्न दाहाल उनकै निवास पुगेका थिए ।

आज विहान भएको भेटवार्तामा उनीहरुबीच अहिले कायम रहेको गठबन्धनलाई निरन्तर अघि बढाउनेबारे कुराकानी भएको बुझिएको छ ।

पछिल्लो समय एमालेभित्र एकताको प्रयास भएको र कांग्रेस, माओवादी केन्द्र, एमाले माधव नेपाल समूह, जसपाको उपेन्द्र यादव समूह र जनेमोर्चा सम्मिलित गठबन्धन भत्काउने षड्यन्त्र भएको भन्दै कुनैपनि हालतमा उक्त षड्यन्त्रलाई असफल पार्नेबारे दाहाल र नेपालबीच सहमति भएको बुझिएको छ ।

नेता नेपालले हिजोमात्रै अध्यक्ष केपी शर्मा ओलीले आफूहरुलाई आम माफी दिने भनेर गरेको घोषणालाई लिएर व्यंग्य कसेका थिए । उनले ओलीलाई महाराजको संज्ञा दिएका थिए । नेता नेपालले ओलीलाई दिएको जवाफबारे आफूले भेटमा प्रशंसा गरेको पनि दाहालले जानकारी गराएका छन् ।

Leave a Reply

Your email address will not be published. Required fields are marked *