एमाले सुदूरपश्चिम प्रदेश कमिटीका निर्णय अवैध र अमान्य : भीम रावल

काठमाडाैं । नेकपा (एमाले)का उपाध्यक्ष भीम रावलले आज बस्न लागेको सुदूरपश्चिम प्रदेश कमिटीको बैठकले गरेका निर्णय अवैध र अमान्य हुने बताएका छन्।

एमाले सुदूरपश्चिम इन्चार्ज लेखराज भट्ट र प्रदेश अध्यक्ष कर्ण थापाले आज प्रदेश कमिटी बैठक बोलाएका छन्। यसअघि एमाले सुदूरपश्चिम इन्चार्ज रहेका रावलले त्यो १० बुँदे सहमतिको विपरीत भएको बताएका हुन्।

एमाले अध्यक्ष केपी शर्मा ओलीले नेकपा (माओवादी केन्द्र)बाट आएका भट्टलाई सुदूरपश्चिम इन्चार्ज बनाएका छन्। रावलले १० बुँदे सहमति अनुसार, आफूलाई इन्चार्ज बनाउनुपर्ने माग गर्दै आएका छन्।

आज बस्न लागेको प्रदेश कमिटी बैठक १० बुँदे सहमति विपरीत भएको रावलले जिकिर गरेका छन्। उनले ट्वीट गर्दै भनेका छन्, “आज हुने भनिएको कथित सुप प्रदेश कमिटीको बैठक १० बुँदे सहमति र त्यसको कार्यान्वयनका लागि जारी अपानी १२ को विपरीत छ।”

उपाध्यक्ष रावलले यसलाई गुटबन्दी भनेका छन्। “यो गुटबन्दीको नमूना हो,” रावलले भनेका छन्, “यो बैठक र यसका निर्णयहरू अवैध र अमान्य छन्।”

Leave a Reply

Your email address will not be published.